ठाणे जिल्ह्यातील प्रकल्प वेळेत पूर्ण करावेत – मुख्य सचिव सुजाता सौनिक

ठाणे : जिल्ह्यातील विकासात्मक प्रकल्प वेळेत आणि गतीने पूर्ण व्हावेत, तसेच नागरिकांच्या तक्रारींचे निवारण सकारात्मकतेने करावे, असे निर्देश मुख्य सचिव तथा ठाणे जिल्ह्याच्या पालक सचिव सुजाता सौनिक यांनी दिले. जिल्हाधिकारी कार्यालयात आयोजित 100 दिवसांच्या कृती आराखड्याच्या आढावा बैठकीत त्या बोलत होत्या.

यावेळी ठाणे महानगरपालिका आयुक्त सौरभ राव, ठाणे पोलीस आयुक्त आशुतोष डुंबरे, नवी मुंबई महानगरपालिका आयुक्त कैलास शिंदे, जिल्हा परिषदेचे मुख्य कार्यकारी अधिकारी रोहन घुगे, तसेच विविध महानगरपालिका व विभागांचे वरिष्ठ अधिकारी उपस्थित होते.

महत्त्वाचे मुद्दे:
• आगामी 100 दिवसांत 7 कलमी कृती आराखड्याची प्रभावी अंमलबजावणी करण्यावर भर.
• राज्य सेवा हमी कायद्याची व माहितीचा अधिकार अधिनियम 2005 च्या प्रभावी अंमलबजावणीचे निर्देश.
• CPGRAM प्रणालीद्वारे मिळालेल्या तक्रारींचे तात्काळ निवारण.
• प्रकल्पांमधील अडचणींवर लक्ष ठेवून त्यांची गतीने अंमलबजावणी करणे.

मुख्य सचिव सौनिक म्हणाल्या की, मुख्यमंत्री महोदयांनी दिलेल्या आराखड्याची अंमलबजावणी “गुड गव्हर्नन्स” साधण्यासाठी अत्यंत महत्त्वाची आहे. जिल्ह्यातील प्रकल्प वेळेत पूर्ण होण्यासाठी सर्व संबंधित यंत्रणांनी समन्वय साधावा, आणि अडचणी असल्यास थेट संपर्क साधावा.

बैठकीच्या प्रारंभी जिल्हाधिकारी अशोक शिनगारे यांनी 100 दिवसांच्या कृती आराखड्याची संगणकीय सादरीकरणाद्वारे माहिती दिली. उपस्थित अधिकाऱ्यांनी प्रकल्पांवरील प्रगतीचा आढावा सादर केला.