मुंबई ; लोकसभेची रणधुमाळी सुरु असताना कोल्हापूर लोकसभा मतदारसंघातील राजकीय वातावरण चांगलेच तापलं आहे . कोल्हापूरचे विद्यमान खासदार आणि महायुतीचे उमेदवार संजय मंडलिक (Sanjay Mandlik)यांनी महाविकास आघाडीचे उमेदवार श्रीमंत शाहू छत्रपती(Shrimant Shahu Chhatrapati) यांच्याबद्दल वादग्रस्त विधान केलं आहे . आताचे महाराज हे कोल्हापूरचे महाराज आहेत का? ते खरे वारसदार नाहीत, ते दत्तक आले आहेत असे त्यांनी म्हटले आहे .यावरून आता काँग्रेस जिल्हाध्यक्ष आमदार सतेज पाटील (Satej Patil )यांनी संजय मंडलिक यांना जोरदार फटकारले आहे. मंडलिकांनी छत्रपती घराण्याचा केलेला अपमान जनता सहन करणार नाही ,याला कोल्हापूरची जनताच उत्तर देईल . स्वत:च्या स्वार्थासाठी ते अशी वक्तव्ये करत आहेत, सुरुवात त्यांनी केलीय, शेवट कोल्हापूरची जनता करेल अशा शब्दात त्यांनी हल्लाबोल चढवला आहे
दरम्यान खासदार संजय मंडलिक यांच्या वक्तव्याने कोल्हापुरात शाहूप्रेमीसह जनतेमध्ये संतापाची लाट पसरली आहे. संजय मंडलिक यांनी केलेल्या वक्तव्यावर त्वरित माफी मागावी .आपल्यावर एक लाखांचं लीड पडणार हे लक्षात आल्यानंतर त्यांच्याकडून अशी वक्तव्य केली जात आहेत . या वक्तव्याचे प्रायश्चित्त कोल्हापूरची जनता त्यांना नक्की देईल. आता बाजू सांभाळून घेण्यासाठी प्रवीण दरेकरांकडून जुन्या गोष्टी उकरून काढल्या जात आहेत. मुख्यमंत्री एकनाथ शिंदे यांनी देखील या वक्तव्याची दखल घेत याबाबत खुलासा करावा. वैयक्तिक टीकेची सुरुवात आम्ही केली नाही या सगळ्याचा शेवट मात्र कोल्हापूरची जनता करेल, कोल्हापुरी भाषेत उत्तर द्यायची वेळ आल्यास देतील, असा इशाराही सतेज पाटील यांनी दिला आहे
त्यानंतर ते म्हणाले की, मंडलिकांच्या पायाखालची वाळू घसरत चालली आहे. त्यांची वक्तव्ये पब्लिक डोमेनमध्ये आहेत, मग आता त्यांना चिट्टी कोणी लिहून दिली का? असा टोला त्यांनी लगावला.कोण सल्लागार आहेत माहीत नाही की स्वत: आहेत माहीत नाही. कुस्ती करा पण खालच्या पातळीवर टीका योग्य नसल्याचे सतेज पाटील म्हणाले आहेत
