मुंबई : गेल्या काही दिवसांपासून नाशिक लोकसभा मतदारसंघावरून महायुतीत (Mahayuti Seat Sharing) जोरदार रस्सीखेच सुरु आहे . नुकतीच या मतदारसंघातून राष्ट्रवादी अजित पवार गटाचे मंत्री छगन भुजबळ (Chhagan Bhujbal) यांनी माघार घेतली आहे . यानंतर हा तिढा सुटेल असे बोलले जात आहे. मात्र आता शिवसेना शिंदे गटातदेखील दोन गट पडले आहेत. या जागेसाठी एकीकडे खासदार हेमंत गोडसे यांनी अनेक वेळा ठाणे येथे जात मुख्यमंत्री एकनाथ शिंदे (CM Eknath Shinde) यांच्या घरासमोर आंदोलने केली आहेत . तर शिंदे गटाचे नाशिक जिल्हाप्रमुख अजय बोरस्ते (Ajay Boraste) यांनी देखील त्यांची भेट घेत नाशिकमधून लोकसभा (Nashik Lok Sabha Constituency) लढवण्याची तयारी दर्शवली आहे .त्यामुळे या मतदारसंघात कोणाची वर्णी लागणार याकडे राजकीय वर्तुळाचे लक्ष लागले आहे .
लोकसभेची रणधुमाळी सुरु असतानाच या मतदारसंघातून उमेदवार निश्चित करण्यासाठी दिल्लीला केंद्रीय गृहमंत्री अमित शाह यांच्यासोबत मुख्यमंत्री एकनाथ शिंदे, उपमुख्यमंत्री देवेंद्र फडणवीस, अजित पवार आणि महायुतीच्या इतर प्रमुख नेत्यांची बैठकही पार पडली होती . या बैठकीत जागावाटपावर चर्चा झाली. यावेळी राष्ट्रवादीचे छगन भुजबळ यांना उमेदवारी द्यावी असेही सांगण्यात आले होते . मात्र तीन आठवडे उलटून गेले तरी उमदेवार जाहीर केला नव्हता . या निवडणुकीसाठी महाविकास आघाडीचे उमेदवार त्या ठिकाणी मागील तीन आठवड्यापासून फिरत आहे. त्यांचा प्रचार देखील पुढे गेला आहे . जेवढा निर्णय घ्यायला वेळ लागेल तेवढ्या अडचणी वाढणार आहेत.त्यामुळे अधिक तिढा न वाढवता मी या निवडणुकीतून माघार घेतली असल्याचे भुजबळ यांनी स्पष्ट सांगितले . आता त्यांच्या माघारीनंतर शिवसेना शिंदे गटाचे विद्यमान खासदार हेमंत गोडसे यांनी पुन्हा एकदा उमेदवारीसाठी जोर लावला आहे . त्यामुळे आता महायुतीत ही जागा कोणाला सुटणार हे पाहणे महत्वाचे ठरणार आहे .
दरम्यान दुसरीकडे या नाशिक लोकसभा मतदारसंघात महाविकास आघाडीकडून (Mahavikas Aghadi)शिवसेना उद्धव बाळासाहेब ठाकरे गटाने (Shiv Sena UBT) सिन्नरचे माजी आमदार राजाभाऊ वाजे (Rajabhau Waje) यांना उमेदवारी जाहीर केली आहे. राजाभाऊ वाजे यांच्याकडून नाशिकमध्ये जोरदार प्रचारालाही सुरुवात करण्यात आली आहे.मात्र अजूनही महायुतीत जागेचा तिढा निर्माण झाला आहे .
