महामार्ग वाहतूक शाखेकडून वारंवार पत्रव्यवहार झाल्याचा दावा; मोठी दुर्घटना होण्यापूर्वी उपाययोजना करण्याची प्रवाशांची मागणी
महाड : महाड–मंडणगड मार्गावरील तेलंगे मोहल्ला परिसरात रस्त्यालगत असलेल्या उघड्या विहिरीवर अद्याप सुरक्षा जाळी अथवा मजबूत संरक्षक व्यवस्था करण्यात आलेली नसल्याने स्थानिक नागरिक आणि वाहनचालकांकडून चिंता व्यक्त केली जात आहे. या विहिरीवर तातडीने सुरक्षा जाळी बसवण्याबाबत महामार्ग वाहतूक शाखेच्या अधिकाऱ्यांनी राष्ट्रीय महामार्ग उपविभाग, महाड यांच्याकडे वारंवार पत्रव्यवहार केल्याचा दावा करण्यात येत आहे. मात्र अद्याप प्रत्यक्ष सुरक्षा उपाययोजना झालेली नसल्याने “दुर्घटना झाल्यानंतरच प्रशासनाला जाग येणार का?” असा सवाल प्रवाशांकडून उपस्थित केला जात आहे.
दिंडोरी दुर्घटनेनंतर राज्यभर safety auditचे आदेश
एप्रिल 2026मध्ये नाशिक जिल्ह्यातील दिंडोरी येथे रस्त्यालगतच्या उघड्या विहिरीत वाहन कोसळून एका कुटुंबातील नऊ जणांचा मृत्यू झाला होता. मृतांमध्ये सहा मुलांचा समावेश होता. या दुर्घटनेनंतर मुख्यमंत्री देवेंद्र फडणवीस यांनी सार्वजनिक वापराच्या रस्त्यांलगत अथवा वर्दळीच्या भागातील उघड्या विहिरींचे तातडीने safety audit करण्याचे निर्देश दिले होते. अशा विहिरींची गरज, संरक्षक भिंत आणि अन्य सुरक्षा उपाय तपासण्याचे आदेश प्रशासनाला देण्यात आले होते.
रस्त्यापासून अगदी जवळ विहीर
महाड–मंडणगड मार्गाचे दुपदरीकरण आणि काँक्रीटीकरण करण्यात आले असून तेलंगे मोहल्ला परिसरात रस्त्याच्या अगदी लगत ही विहीर आहे. स्थानिकांच्या म्हणण्यानुसार काही ठिकाणी विहीर आणि रस्त्यामधील अंतर अत्यंत कमी आहे. रात्री परिसरात पुरेसा प्रकाश नसल्यामुळे वाहनचालकांसाठी धोका अधिक वाढतो. एखाद्या वाहनाचा ताबा सुटल्यास किंवा वाहन रस्त्याच्या कडेला गेल्यास गंभीर दुर्घटना होण्याची शक्यता नाकारता येत नाही, अशी भीती स्थानिकांनी व्यक्त केली आहे.

महामार्ग वाहतूक शाखेची पत्रे?
स्थानिक माहितीनुसार मुंबई–गोवा राष्ट्रीय महामार्गाशी संबंधित महाड येथील महामार्ग वाहतूक शाखेने या विहिरीवर सुरक्षा जाळी अथवा अन्य प्रतिबंधात्मक व्यवस्था करण्यासाठी राष्ट्रीय महामार्ग उपविभागाला चार ते पाच वेळा लेखी कळवले आहे. मात्र या पत्रांवर नेमकी कोणती कार्यवाही करण्यात आली, सुरक्षा उपाय मंजूर झाले आहेत का आणि ते कधी पूर्ण केले जाणार, याबाबत अधिकृत माहिती समोर आलेली नाही.
अभियंत्यांचा प्रतिसाद मिळाला नाही
या प्रकरणाबाबत राष्ट्रीय महामार्ग विभागाचे शाखा अभियंता अभिजीत झेंडे यांच्याशी संपर्क साधण्याचा प्रयत्न करण्यात आला; मात्र त्यांचा प्रतिसाद मिळू शकला नाही. त्यांची भूमिका प्राप्त झाल्यानंतर ती प्रसिद्ध करण्यात येईल.
दुर्घटनेपूर्वी उपाययोजना करा
महाड–मंडणगड मार्गावर दिवस-रात्र वाहनांची वर्दळ असते. त्यामुळे विहिरीभोवती मजबूत सुरक्षा जाळी, संरक्षक कठडा, reflective warning signs आणि रात्री दृश्यमान राहतील अशा सुरक्षा उपाययोजना तातडीने करण्याची मागणी प्रवासी आणि स्थानिक नागरिकांकडून करण्यात येत आहे. दिंडोरीतील दुर्घटनेनंतर राज्य सरकारने उघड्या विहिरींच्या सुरक्षेबाबत स्पष्ट निर्देश दिले असताना तेलंगे मोहल्ल्यातील ही विहीर अजूनही असुरक्षित अवस्थेत का आहे, याचे उत्तर संबंधित विभागाने द्यावे, अशी मागणीही नागरिकांकडून होत आहे.

