X: @therajkaran
नागपूर: विधीमंडळाच्या हिवाळी अधिवेशनाच्या (Winter session) पहिल्याच दिवशी विधान सभेत आज राज्यातील अवकाळी पाऊस, दुष्काळी स्थिती आणि शेतकऱ्यांची दुरावस्था हा विषय विरोधी पक्षनेते विजय वडेट्टीवार यांनी स्थगन प्रस्तावाच्या सूचनेवर बोलताना उपस्थित केला. शेतकऱ्यांना सरसकट मदत करा, संपूर्ण कर्जमाफी करा, (LoP Vijay Wadettiwar demands complete loan waiver for farmers) अशी मागणी आक्रमकपणे केली. उपमुख्यमंत्री देवेंद्र फडणवीस यांनी तितक्याच जोरदारपणे उत्तर देताना पूर्ण माहिती घेऊन बोला, असे सुनावत महायुती सरकार शेतकऱ्यांच्या पाठीशी खंबीरपणे राहिल, असे ठासून सांगितले.
महायुती सरकार काळातील (Mahayuti Government) या दुसऱ्या हिवाळी अधिवेशनाची सुरुवात वंदे मातरम् आणि राज्यगीताने झाली. तत्पूर्वी सत्ताधारी बाकांवरून काहींनी, “मध्यप्रदेश, छत्तीसगड, राजस्थान अगली बार हिंदुस्थान”,अशा घोषणा दिल्या.
विरोधी पक्षनेते विजय वडेट्टीवार यांनी नियम-९७ अन्वये दिलेल्या स्थगन प्रस्तावावर अध्यक्ष राहुल नार्वेकर यांनी बोलण्याची परवानगी दिली. यावर बोलतांना वडेट्टीवार यांनी सरकारवर टीका केली. अवकाळी पावसाने २२ जिल्ह्यांत पूर्णतः दुरावस्था झाली आहे, पंचनामे (panchnama) पूर्ण होत नाहीत, आपण शेतकऱ्यांच्या बांधावर गेलो, तेव्हा मुख्यमंत्री प्रचारात व्यस्त होते. शासन टंचाईसदृश स्थिती असा नविन शब्दप्रयोग,अशी टिका त्यांनी केली. शेतकऱ्यांच्या बांधावर जायला तुम्हाला वेळ नाही. संपूर्ण कामकाज बाजूला ठेवून दुष्काळ स्थितीवर चर्चा करा, अशी मागणी वडेट्टीवार यांनी केली.
उपमुख्यमंत्री देवेंद्र फडणवीस (Devendra Fadnavis) विरोधी पक्षनेत्यांच्या आरोपांचे खंडन करताना म्हणाले, चाळीस तालुके केंद्र सरकारच्या निकषानुसार घोषित झाले आहेत. उर्वरित बाराशे मंडले राज्य सरकारने दुष्काळसदृश घोषित केले. जे जे त्यांना मिळणार तेच यांना मिळणार आहे. राज्य सरकारने दहा हजार कोटी रुपये शेतकऱ्यांना दिले होते, यंदाही देऊ. एनडीआरएफपेक्षा (NDRF) अधिक देण्याचा आम्ही प्रयत्न करत आहोत. मदतीचा निकष दोन हेक्टर वरून तीन हेक्टरमधील नुकसानभरपाई (compensation) असा असेल, अशी घोषणा फडणवीस यांनी केली, तेव्हा सत्ताधारी सदस्यांनी बाके वाजवून त्याचे स्वागत केले.
तालिका सदस्य जाहीर
संजय शिरसाट, समीर कुणावार, चेतन तुपे, ॲडव्होकेट यशोमती ठाकूर या सदस्यांची नावे विधानसभा तालिका सदस्य म्हणून विधानसभा अध्यक्ष राहुल नार्वेकर यांनी आज सभागृहात जाहीर केली.
दिवंगत सदस्यांना आदरांजली
माजी राज्यमंत्री गोवर्धन मांगीलालजी शर्मा, माजी उपाध्यक्ष व माजी मंत्री व माजी विरोधी पक्षनेते बबनराव दादाबा ढाकणे, गुलाबराव वामनराव पाटील, श्रीपतराव दिनकरराव शिंदे, शेख रशिद शेख शफी, राजाराम नथु ओझरे, वसंतराव जनार्दन कार्लेकर, गोविंद रामजी शेंडे, दिगंबर नारायण विशे या माजी विधानसभा सदस्यांना आज विधानसभेत शोकप्रस्ताव संमत करून आदरांजली वाहण्यात आली.अध्यक्ष राहुल नार्वेकर यांनी यावेळी दिवंगत सदस्यांप्रती भावना व्यक्त केल्या.
