सांगली
माजी मुख्यमंत्री आणि काँग्रेसचे ज्येष्ठ नेते अशोक चव्हाण यांनी आज काँग्रेसमधून राजीनामा दिला. या वृत्ताने राजकीय वर्तुळात खळबळ उडाली आहे. चव्हाणांनी पक्ष सोडण्याचं नेमकं कारण अद्याप जाहीर केलंलं नाही. दरम्यान त्यांच्यासोबत ११ आमदार पक्षाचा राजीनामा देणार असल्याची चर्चा सुरू झाली आहे. यामध्ये ज्येष्ठ दिवंगत काँग्रेस नेते पंतगराव कदम यांचे सुपूत्र विश्वजीत कदम यांचंही नाव समोर येत आहे.
अशोक चव्हाण येत्या १५ फेब्रुवारीला भाजपत प्रवेश करणार असल्याची शक्यता गडद झाली आहे. त्यांच्यासोबत विश्वजीत कदमदेखील भाजपमध्ये जाऊ शकतात अशा चर्चा सुरू असताना कदमांचा एक व्हिडीओ समोर आला आहे. या व्हिडीओतून त्यांनी आपली भूमिका स्पष्ट केली आहे.
काय म्हणाले विश्वजीत कदम?
आज सकाळीच राज्यातून धक्कादायक बातमी समोर आली आहे. राज्याचे ज्येष्ठ नेते अशोक चव्हाणांनी काँग्रेसच्या आमदारकीचा राजीनामा दिला. यामुळे काँग्रेसचा एक कार्यकर्ता म्हणून मला अत्यंत दु:ख झालेलं आहे. यादरम्यान मी देखील आमदारकीचा राजीनामा दिल्याच्या चुकीच्या बातम्या दाखवल्या जात आहेत. मात्र मी कोणताही राजीनामा दिलेला नाही. माझ्या व्यक्तिगत जीवनात पलूस-कडेगावच्या बांधवांना विश्वासात घेतल्याशिवाय मी कोणतंही पाऊल उचलणार नाही.
