मुंबई — महिला आरक्षणाच्या मुद्द्यावरून मुख्यमंत्री Devendra Fadnavis यांनी काँग्रेससह विरोधकांवर जोरदार टीका करत, राज्यभर आंदोलन उभारण्याची घोषणा केली. महिला आरक्षणाच्या प्रक्रियेला विरोधकांनी अडथळा आणल्याचा आरोप त्यांनी केला. पत्रकार परिषदेत बोलताना फडणवीस म्हणाले की, महिला प्रतिनिधित्व वाढवण्याच्या प्रक्रियेला विलंब होणे हे दुर्दैवी आहे. २०२३ मध्ये या विधेयकाला संमती दिलेल्या विरोधकांनी आता भूमिका बदलल्याचा आरोप त्यांनी केला.
फडणवीस यांनी या घडामोडींना महिलांच्या राजकीय प्रतिनिधित्वाच्या दृष्टीने महत्त्वाचे असल्याचे सांगत, या मुद्द्यावर जनजागृती करण्यासाठी राज्यभर मोहिम राबवण्यात येईल, असे स्पष्ट केले. यासाठी महिलांच्या स्वाक्षऱ्या गोळा करण्याचा उपक्रमही राबवण्यात येणार असल्याची माहिती त्यांनी दिली. संसदेतील जागावाढीबाबत बोलताना फडणवीस म्हणाले की, लोकसंख्येतील वाढ लक्षात घेता ही प्रक्रिया आवश्यक आहे. सर्व राज्यांमध्ये समतोल राखण्याचा प्रयत्न केंद्र सरकारकडून करण्यात आल्याचा दावा त्यांनी केला.
या मुद्द्यावरून सत्ताधारी आणि विरोधकांमध्ये आरोप-प्रत्यारोप वाढले असून महिला आरक्षणाच्या अंमलबजावणीचा मुद्दा पुन्हा एकदा राजकीय केंद्रस्थानी आला आहे.
The Rajkaran NOTE
महिला आरक्षण हा केवळ राजकीय वादाचा मुद्दा नाही, तर तो प्रतिनिधित्व, निवडणूक रचना आणि धोरणात्मक संतुलन यांच्याशी निगडित आहे. त्यामुळे या विधेयकाची अंमलबजावणी कशी आणि केव्हा होते, यावर पुढील राजकीय समीकरणे ठरणार आहेत.
