कोल्हापूर- महाराष्ट्रातील राजघराण्यांतील महत्त्वाचं स्थान असलेल्या कोल्हापूरच्या गादीचे वारसदार शाहू छत्रपती लोकसभेच्या रिंगणात उतरलेले आहेत. काँग्रेसच्या वतीनं शाहू छत्रपतींना लोकसभेचं तिकीट देण्यात आलेलं आहे. मंगळवारी मोठ्या शक्तिप्रदर्शनात शाहू छत्रपतींनी आपला उमेदवारी अर्ज दाखल केलेला आहे. यावेळी छत्रपतींच्या वारसदारांची मालमत्ता पहिल्यांदाच समोर आलेली आहे. सातारा आणि कोल्हापूर अशी छत्रपती शिवरायांच्या गादीचे पुढे दोन भाग झाले. त्यातील कोल्हापूरच्या गादीला नेहमीच विशेष महत्त्व राहिलेलं आहे.
शाहू छत्रपतींकडे किती संपत्ती?
शाहू छत्रपतींनी लोकसभा निवडणुकीसाठी उमेदवारी अर्ज दाखल करताना, प्रतिज्ञापत्रात त्यांच्या संपत्तीचा आकडा नमूद केलेला आहे. त्यांनी दिलेल्या प्रतिज्ञापत्रानुसार त्यांच्याकडे आज घडीला 297 कोटी 38 लाख 8 हजारांची मालमत्ता असल्याचं समोर आलंय.
परिवाराकडे किती संपत्ती
- कोल्हापूरच्या गादीचे वारसदार असलेल्या शाहू छत्रपतींकडे स्थावर आणि जंगम मालमत्ता मिळून 297 कोटी 38 लाख 8 हजारांची संपत्ती आहे.
- यात जंगम मालमत्ता 147 कोटी 64 लाख 49 हजार, तर स्थावर मालमत्ता 149 कोटी 73 लाख 59 हजार इतकी आहे.
- शाहू छत्रपतींच्या पत्नी याज्ञसेनीराजे यांच्याकडे 41 कोटी 6 लाखांची संपत्ती आहे. यात 23.71 कोटींची स्थावर तर 17.35 कोटींची जंगम मालमत्ता आहे.
- शाहू छत्रपती यांच्याकडे 1 कोटी 56 लाखांचे सोन्याचे तर 55 लाखांचे चांदीचे दागिने आहेत.
- त्यांच्या नावावर असलेल्या गाड्यांची किंमत 6 कोटींच्या घरात आहे.
- त्यांच्या नावावर 122 कोटी 88 लाखांची शेतजमीन आहे. तर पत्नीच्या नावे 7.52 कोटींची शेतजमीन आहे.
- विशेष म्हणजे शाहू छत्रपतींच्या नावे कोणतंही कर्ज नाही.
- छत्रपतींकडे दोन विन्टेज कार आहेत. त्यातील एक 1936ची मेबॅच कार आहे. ही कार 1949 साली खरेदी करण्यात आलीय. सध्या या गाडीची किंमत 5 कोटी इतकी आहे.
- तर 1962 साली खरेदी करण्यात आलेली मर्सिडीज शाहूंकडे असून तिची किंमत सध्या 20 लाख इतकी आहे.
- शाहू छत्रपतींच्या नावे असलेल्या 15.5 चौरस फुटावरील भव्य न्यू पॅलेसचं बाजारमूल्य 18.11 कोटी इतकं आहे.
शाहूंचे प्रतिस्पर्धी मंडलिकांकडे किती मालमत्ता?
शिंदेंच्या शिवसेनेचे उमेदवार आणि विद्यमान खासदार संजय मंडलिक हे शाहू छत्रपतींच्या समोर उभे ठाकलेत. त्यांची एकूण संपत्ती 14 रोटी 37 लाख 28,398 रुपये इतकी आहे. यात 13 कोटी 21 लाख 95,873 रुपयांची स्थावर मालमत्ता आहे. तर 1 कोटी 15 लाख 32,525 रुपयांची जंगम मालमत्ता आहे.
हेही वाचाःराम कुणाला पावणार? अनेक उमेदवार राममंदिरांमध्ये, जन्मोत्सवात सहभागी, रामाचं राजकीय महत्त्व वाढलं?
