19,753 प्रमाणपत्रे कागदपत्रांशिवाय सुधारल्याचा दावा; प्रकरणाची SIT कडून चौकशी सुरू
मुंबई : मुंबई महानगरपालिकेच्या जन्म प्रमाणपत्र व्यवस्थापनात मोठ्या प्रमाणावर अनियमितता झाल्याचा गंभीर आरोप भाजप नेते डॉ. किरीट सोमैया यांनी केला आहे. माहितीच्या अधिकाराखाली (RTI) मिळालेल्या उत्तराचा हवाला देत त्यांनी गेल्या दोन वर्षांत जुन्या SAP प्रणालीद्वारे 86,020 जन्म प्रमाणपत्रे बेकायदेशीरपणे जारी करण्यात आल्याचा दावा केला.
डॉ. सोमैया यांनी प्रसिद्ध केलेल्या माहितीनुसार, यापैकी 19,753 जन्म प्रमाणपत्रे सुधारणा (Correction) या प्रक्रियेअंतर्गत आवश्यक कागदपत्रांशिवाय जारी करण्यात आल्याची माहिती मुंबई महानगरपालिकेने RTI उत्तरात दिल्याचा त्यांचा दावा आहे.
त्यांच्या म्हणण्यानुसार, एम/पूर्व विभाग (गोवंडी–देवनार) येथे सर्वाधिक अनियमितता आढळून आली असून, 14,194 प्रमाणपत्रे सुधारणा प्रक्रियेद्वारे जारी करण्यात आली. त्यापैकी 3,132 प्रमाणपत्रे कोणत्याही कागदपत्रांशिवाय जारी करण्यात आल्याचा उल्लेख RTI उत्तरात असल्याचे त्यांनी सांगितले.
याशिवाय, 6,109 जन्म प्रमाणपत्रे दुरुस्तीच्या नावाखाली दुबार (Duplicate) जारी करण्यात आल्याचाही दावा डॉ. सोमैया यांनी केला आहे.
SIT कडून चौकशी सुरू
या प्रकरणाची चौकशी राज्य सरकारने विशेष तपास पथकाकडे (SIT) सोपवली असून, मुख्यमंत्री देवेंद्र फडणवीस यांच्या निर्देशानुसार मुंबई सहपोलीस आयुक्त (गुन्हे) यांच्या अध्यक्षतेखाली ही चौकशी सुरू असल्याचे डॉ. सोमैया यांनी सांगितले.
महापालिकेची अधिकृत भूमिका अद्याप स्पष्ट नाही
या प्रकरणात मुंबई महानगरपालिकेकडून किंवा SIT कडून या आरोपांवर स्वतंत्र अधिकृत प्रतिक्रिया अद्याप उपलब्ध झालेली नाही. चौकशीचा अंतिम अहवाल आल्यानंतरच अनियमिततेचे स्वरूप आणि जबाबदारी स्पष्ट होईल.
