X: @therajkaran
राष्ट्रवादी काँग्रेस (NCP) पक्षात फूट पडल्यापासून अनेक नेत्यांनी राष्ट्रवादी काँग्रेस पक्ष शरदचंद्र पवार (Nationalist Congress Party Sharadchandra Pawar) गटाला सोडचिट्ठी दिली असून अजित पवार यांच्या राष्ट्रवादी पक्षात प्रवेश केला आहे. आता बीडमध्ये (Beed News) शरद पवार गटाला मोठा धक्का बसला आहे. बीडमधील अनेक कार्यकर्त्यांचा आज अजित पवार गटात प्रवेश होणार आहे.
बीड नगरपरिषदेचे माजी सभापती अमर नाईकवाडे, माजी उपनगराध्यक्ष फारुक अली पटेल, माजी उपनगराध्यक्ष मोईन मास्टर यांच्यासह अनेक कार्यकर्ते आज राष्ट्रवादी काँग्रेस पक्षात (NCP) प्रवेश करणार आहेत. आज संध्याकाळी पाच वाजता मुंबईत पक्षप्रवेश पार पडणार आहे. त्यांच्या या पक्षप्रवेशामुळे शरद पवार गटाला मोठा धक्का बसला आहे. उपमुख्यमंत्री अजित पवार (Ajit Pawar), प्रदेशाध्यक्ष सुनील तटकरे, मंत्री धनंजय मुंडे यांच्या उपस्थितीत पक्ष प्रवेश होणार आहे. बीड मधील एक मोठा गट अजित पवारांना (Ajit Pawar) पाठिंबा देत असल्यामुळे संदीप क्षीरसागर यांना मोठा फटका बसणार आहे. मुंबईत वाय बी चव्हाण सेंटर शेजारी असलेल्या महिला आर्थिक विकास महामंडळाच्या सभागृहात पक्षप्रवेशाचा कार्यक्रम पार पडणार आहे.
याआधी निवडणूक आयोगाने (Election Commission) राष्ट्रवादी पक्ष व पक्षाचे चिन्ह अजित पवार गटाला दिल्यानंतर अजित पवार गटाने पक्षबांधणीला जोरदार सुरुवात केली आहे. तर दुसरीकडे शरद पवार गटाला तुतारी हे चिन्ह मिळाले असून शरद पवारांनी (Sharad Pawar) पक्ष पुन्हा नव्याने उभारण्यासाठी जोर लावला आहे. त्यातच आता अजित पवार गटाने शरद पवारांना आणखी एक मोठा धक्का दिला आहे.
