१५ दिवसांत कारवाई न झाल्यास राज्यव्यापी आंदोलनाचा इशारा
महाड : महाड एमआयडीसी परिसरातील सिद्धार्थ कलर केम प्रा. लि. आणि कोपरान रिसर्च लॅबोरेटरीज येथे शासकीय अनुदानित निंबोळी-लेपित युरियाचा कथित बेकायदेशीर साठा आणि वापर झाल्याच्या प्रकरणाची सखोल चौकशी करून संबंधित दोषींवर कठोर फौजदारी कारवाई करण्यात यावी, अशी मागणी राष्ट्रवादी काँग्रेस पक्ष (शरदचंद्र पवार) यांनी केली आहे.
या मागणीसाठी पक्षाच्या वतीने महाड एमआयडीसी पोलीस ठाणे, महाड तहसीलदार कार्यालय आणि उपविभागीय अधिकारी (प्रांताधिकारी) यांच्या माध्यमातून रायगड जिल्हाधिकाऱ्यांना निवेदन देण्यात आले.
राष्ट्रवादी काँग्रेस (शरद पवार)चे रायगड जिल्हा सचिव श्रीहर्ष श्रीकांत कांबळे यांनी सांगितले की, शासनाकडून शेतकऱ्यांना अनुदानित दरात उपलब्ध करून दिल्या जाणाऱ्या खताचा औद्योगिक वापर होत असल्यास तो शेतकऱ्यांच्या हक्कांवर आघात असून या संपूर्ण प्रकरणाची उच्चस्तरीय, निष्पक्ष आणि वेळबद्ध चौकशी व्हावी.
तपासात दोषी आढळणारे मालक, संचालक, अधिकृत स्वाक्षरीदार, वरिष्ठ अधिकारी तसेच या कथित गैरप्रकारात सहभागी असलेल्या सर्व संबंधितांवर फौजदारी गुन्हे दाखल करण्यात यावेत, अशी मागणी त्यांनी केली.
श्रीहर्ष कांबळे यांनी इशारा दिला की, पुढील १५ दिवसांत या प्रकरणात योग्य ती कारवाई झाली नाही, तर रायगड जिल्हाध्यक्षांच्या नेतृत्वाखाली हा विषय प्रदेशाध्यक्ष शशिकांत शिंदे आणि आमदार रोहित पवार यांच्या निदर्शनास आणून देण्यात येईल. आवश्यक असल्यास राज्यभर जनआंदोलन उभारण्यात येईल, असेही त्यांनी सांगितले.
पक्षाने या प्रकरणात संपूर्ण पुरवठा साखळी, आर्थिक व्यवहार, संबंधित कारखानदार, वितरक आणि अन्य संबंधित घटकांची निष्पक्ष चौकशी करून दोषींवर कठोर कारवाई करण्याची तसेच राज्यातील औद्योगिक क्षेत्रांमध्ये विशेष तपासणी मोहीम राबविण्याची मागणी केली आहे.
यावेळी पराग वडके, रुपेश सकपाळ, निकेत तांबट, नितेश पवार यांच्यासह राष्ट्रवादी काँग्रेस (शरद पवार) पक्षाचे पदाधिकारी व कार्यकर्ते उपस्थित होते.
